講講買樓

網友Ivan想我講多d買樓的睇法. 其實我自己對買樓的經驗唔多. 到目前為止, 我只係買過3次樓, 香港2次, 國內1次. 最失敗的經驗, 係97年2月我買入人生第1個物業, 下場係蝕左34.5%本金, 未計交易費用, 經紀俑金, 供樓利息, 和機會成本. 不過, 其餘2次買樓都係成功之作, 包括在03年沙士事件之後買入現時住緊的物業, 和國內珠海的物業. 珠海的物業的買入價係2百幾蚊港元1平方尺, 即使近期國內樓價被打壓, 相信都好難買到咁平.

不過, 無論如何, 我對樓市的經驗和知識都係非常有限, 而家要睇多d樓盤, 了解多d. 大致來講, 我傾向買大型屋宛, 我比較喜歡主人房要夠大, 放到6尺床, 客廳和飯廳都好重要, 可以同另一半好好享受美食, 然後好舒服地坐在sofa上欣賞電視節目或睇碟. 地點也是考慮的因素, 是否接近對方家, 自己家, 對方工作地點, 自己工作地點, 教會, 朋友, 娛樂,購物, 街市(尤其是我的至愛:海鮮) 等. 仲有實用率, 會所設施, 物業管理, 發展商, 樓齡, 景觀, 坐向, 交通, 物業的升值潛力等等.

另外, 今日買左一本投資週刊, 內文講到一間挪威基金 DnB Asset 最近增持了一些股票, 其中一隻引起我的興趣, 就係716勝獅貨櫃, 睇返聯交所資料, 最近分別有瑞士銀行於10月29日，以每股$3.739，增持勝獅貨櫃<0716.HK>38萬股，其持股量已由6.98%增至7.04%; 主席張允中於10月23日，以每股平均價$4.041，增持公司112.8萬股，其持股量由43.56%增至43.72%. 而716勝獅於10月份以股價$4.24，先舊後新配售9168萬股，集資淨額3.79億元.

睇716的業績報告, 負債比率都幾高, 於06年度, 債務淨額與股東資金比率高達112%, 06年勝獅的淨利有2,131.8萬美元, 但財務費用高達1,773.2萬美元. 07年上半年營業額較去年同期上升181.6%, 股東淨利上升50%, EPS上升49.4%. 管理層表示, 未來數年有大量新貨櫃船交付, 加上舊貨櫃的更換估計於08年開始加快, 市場對新貨櫃有強勁需求. 證券行估計07年勝獅業績有90%以上的增長, 08和09也有超過15%的盈利增長, 716勝獅的投機主題係業績反彈.