係時候休息了

最近很少update 個 BLOG, 主要係因為對現時的股市無乜興趣. 有人唔明點解我的BLOG有人睇, 的確, 以現時咁熱烈的市況, 於股市賺錢好像是輕而易舉的事, 唔睇我的BLOG都唔會係損失.

最初睇我BLOG的人相信係那些睇開 3Home Finance 和 Value-Investment newsgroup的朋友. 無論是一間企業也好, 一個投資者也好, 必須要經歷過風浪和時間的考驗, 才知道掂唔掂, 有無料到. newsgroup的朋友肯花時間睇我寫野, 因為大家一齊經歷過03年沙士期間股市那段低迷時期, 因為大家見證過我有勇氣於股災時大手買入股票, 而且面對股價大跌仍然處之泰然. 之後的成功之作, 是在市場未全面睇好中資金融的時候, 極力推薦2318和2628, 當時2318的股價只是12蚊左右, 2628的股價只是5蚊左右.

不過呢d已經係明日黃花的事情, 於目前通街股神的年代, 我已經無用武之地, 雖則個人財富仍然受惠於現時牛氣沖天, 資產漲價的市況.

現在係時候將時間和精神用在其他方面. 畢竟, 投資只是人生的一部份而已.

最後, 回答 yoyo的問題: 對於那些無聊人的惡作劇, 無必要去回應. 雖然有人對我作出恐嚇, 但我從來唔會懼怕惡人. 讓那些滿足於自我幻想的世界之中而樂此不疲的人自便吧. 我仍然會如常地生活, 仍然對靠投資達至財務自由充滿信心.

對於某些BLOGER最近的冷嘲熱諷, 我的回應係: 相煎何太急. 不過, 放冷箭之前, 可否同當事人了解清楚先? 斷章取意, 憑片面的認知就作出批評, 令人心寒.

人情冷暖, 算是見識過了, 市場先生自語暫時告一段落, 不是因為別人的言論, 主要是因為目前過份瘋狂的市況(再加上私事繁忙). 到了他日市況低迷, 一般人對股市失去興趣, 我又忙完私事, 會重出江湖.

一些回應 (20070919)

To Investor: 我已經沽出部分有10%利潤或以上的投機組合, 將會沽埋其餘的投機組合, 然後只會保留核心投資組合和月供股票計劃. 每月儲蓄的新資金將唔會投入股市. 沙士期間, 恆生指數最低跌至8300點左右, 那時我係100%持有股票, 0%現金. 事實上, 由01年911事件之後到現在, 大部分時間我都係100%持股, 從newsgroup時代已經認識我的人會知道, 我是一個不喜歡持有現金的人. 不過, 現時我已經慢慢增加現金水平, 目前大約係22%現金, 78%股票. 對我來講, 投資與投機的分別, 在於心態多於對象. 一般來講, 投機係指一年內會沽出的買貨行動. 至於對象, 投資的對象可以投機, 但投機的對象就唔可以投資.

To 投G新人: 想於股市裡賺大錢, 耐性是非常重要的因素. 如果你將時光倒流, 回望過去5年, 會發覺有唔少可以一筆過大手買入作長線投資的好機會, 想想當時你對買股票抱有什麼態度, 要從歷史中學習, 一定有所得益.

To 下山人: 仍然認為接近6蚊或以下的#183, 投機無問題.

To Seventeenli17: 我本身無持有#2888, 佢的特色係專攻新興市場, 係一間非本土業務比重大過本土業務好多的英資銀行. 有機會的話(指股價大跌)我有興趣買入.

To WigginsL 月供股票應該係中銀最抵, 2萬蚊或以下, 幾多隻股票費用都係50蚊, 而且收股息唔使費用.

寧可錯過也不要犯錯

巴菲特話, 一次大的錯失可以將過去累積成功所得到的東西一筆勾消. 如果將股市當成一個戰場, 將每次的買賣當成一埸戰役, 想贏幾場漂亮的戰役, 雖然不能說是輕而易舉, 但並非無可能, 即使一些股市新手, 也可能有買賣股票賺到豐厚利潤的經驗. 不過, 幾次出色買賣賺取的利潤, 可能因為之後一次輕率的出擊而化為烏有.

我自己親身的經驗, 於股市裡犯錯很多時是因為無耐性. 當手上有現金的時候, 尤其是當沽出股票穫利之後連本帶利現金充裕的時候, 總是心思思想揾一些股票來買, 不斷看報紙財經版, 看看有什麼好介紹. 其實出擊多一次, 就是冒多一次險. 你去賭場觀察一下, 看看那些次次都下注由朝賭到晚的人, 有幾多個可以贏錢離開賭場.

要減少犯錯, 可以試下一些方法. 第一, 提高出擊門檻, 舉例說, 941中移動和3968招商銀行是公認的好公司, 但如果你於現價買入, 未來上升10%和下跌10%的機會可能是各一半, 但如果你耐心等候股價向下調整10%之後才出擊, 回報率和穫利率將會提升. 出擊門檻提得越高, 出擊次數和犯錯機會就越少.

第二, 寧可錯過也不要犯錯. 想像一下, 你家裡需要一張床, 你心中也已經選中了目標. 去到家具店才知道只有一件存貨, 但卻是有瑕疵的次貨, 相信你唔會明知次貨都要非買不可, 或者轉而買張餐枱, 原因是你無論如何也不想空手回家. 記住, 除了假期, 股市星期一至星期五都開市, 永遠都有買貨的機會.

9月13日刊於《資本壹週》Capital Money 094, P.64 〈BLOG爆股壇〉

市場先生私人強積金(13-Sep-07)

狼人於8月27日的作品

今日恆生指數最高見24329點，再創歷史新高。全日收市報24310點，上升357點，成交金額974億元。 現時唔少人對股市仍然樂此不疲, 但我已經無心戀戰, 因為我對股票的興趣同股價係成反比例. 仍然認為現時並非一筆過大手買股票作長線投資的好時候, 現時應該保守一點, 謹慎一點, 現時應該持有多些現金, cash is the king.

以下係狼人於8月27日的作品, 現在再睇, 仍然咁精彩.

【裂口中的呼喊 】

淡友豬在 裂口中呼喊...."我會繼續努力!"

好友羊多得淡友豬的幫忙.., 繼續上路

九月份Wallpaper

天灰灰的

我知道你我都沒有錯

只是忘了怎麼退後

信誓旦旦給了承諾

卻被時間撲了空

我知道我們都沒有錯

只是放手會比較好過

最美的牆紙回憶裡待續

狼人畫集

通常我唔喜歡牛氣沖天的市況, 因為無平野買. 在人人樂觀的時候, 即使好的公司, 都唔會係好的股票, 因為太多人願意不計價去追捧, 不過, 保守的投資者在這個牛市3期的階段, 應該保持一棵恐懼的心. 至於我自己, 最近無乜興致寫同投資有關的文章, 寧願花時間於其他事情上.

在newsgroup裡, 有一位很有才華的網友"狼人", 佢創作的圖畫, 很多人包括我自己都非常欣賞. 有幸得到"狼人"兄的同意, 從今日開始, 會在我的BLOG登出狼人"兄的作品.

輪候中的大餐

受到 貴賓式款待的 好友羊、 淡友豬及大鱷、 野狼.....期待著他們的大餐...

一些回應 (20070902)

回應Eddie: 長線投資的最佳時機係大部分人無興趣買股票的時候, 因為那時即使優質藍籌股價錢都會好平, 可以一筆過大手買入, 然後擺埋一邊, 唔使理佢, 長線持有. 現時股市牛氣沖天, 幾乎全民皆有買股票, 絕對唔係長線投資的好時機, 因為市況一旦逆轉, 即使最優質的藍籌股股價都可能下跌50%. 所以我認為現時只宜月供股票, 和短線投機.

回應kevin: 分析股票的入門書, 林深池的平民資本家係好的選擇, 書中的例子夠晒地道, 有親切感, 而且文字淺白.

另外, 見到newsgroup有關持有匯豐是否好的投資選擇的討論. 我唔知其他人的情況, 只能從自己的實際情況和觀點去講. 正如打仗一樣, 不能孤注一擲只顧進攻, 也要作好戰事失利時退守的預備, 而且三軍未動, 糧草先行, 不論是進攻或者防守, 糧草都是好重要的. 如果投資是一場長期的戰爭, 匯豐就是我的糧草, 就是我大後方強而有力的支援. 以下係過去10年匯豐每股的派息記錄, 每年都超過10%的增長. 有人埋怨匯豐股價近來無增長, 對我來講, 如果匯豐盈利有增長, 派息有增長, 股價無增長對我並非壞事, 因為我靠以股代息可以換更多的股數, 增加收息的基礎. 以我個人的例子, 靠以股代息我手上匯豐的股數平均每年以4.5%的幅度增加, 無乜野值得我擔憂.

新書銷售情況

自從新書於8 月17日大龍鳳大波動市發行到各大書局, 至今有2個星期. 銷售情況如何, 可以睇以下的網址:

http://www.publishing.com.hk/paibang/paibang.asp?code=F&phid=O0000&index=219

http://www.hkbookcity.com/showbook2.php?serial_no=115540

http://www.crown-bookstore.com/show_book1.php?bookid=2305