年紀越大, 應該減少持有股票而增加現金嗎?

通常投資專家的建議係年紀越大, 應該越保守, 減少持有股票而增加現金或者債券的比重. 不過我想問, 假如你一直以來經營家族的銀行生意, 因為到了退休的年紀, 所以有人就建議你將銀行賣盤, 轉而持有現金. 你覺得合理嗎? 難道好的生意不可以一代傳一代, 永遠經營下去嗎?
我會以經營者的心態永遠持有永久組合, 甚至代代相傳.

最近股市有d波動

因為上星期不在香港, 所以無經歷到. 好似跌左千幾點, 不過即使再跌多6,000點, 我都唔會沽出一股永久組合. 跌市對我來講的意義只係同一筆錢可以買多幾股. 所以無任歡迎.

我的永久組合

#5: 14,943 股
#945: 2,000 股
#11: 2,500 股
#2318: 6,000 股
#2628: 12,000 股
#3328: 22,000 股

我會永遠做我永久組合成員的股東

銅價

過去一個星期在新加坡公幹. 回家後追番多少財經新聞. 其中一則新聞講到179德昌罕有地為銅價對沖. 當銅價的上升令到正當生產商都憂慮的時候, 我懷疑目前銅價期貨的買家, 除左炒家, 有唔少係用家, 呢d用家最近可能以炒銅價期貨為正業. 我估計銅價牛氣沖天逆轉的日子可能不遠.

匯豐以股代息

匯豐06年第一次以股代息價係 US 17.5938, 以7.75折算, 大約係136.35HKD. 但匯豐上星期五的收市價只有$134.9. 表面睇來, 應該拿現金. 但大家要記住, 股息要到7月6 日先收到, 你要等到收到股息後先可以於市場買貨. 無人知匯豐7月6 日的股價是多少. 所以現在根本唔知以136.35HKD換股抵d, or 等到7月6 日收到股息後於市場買匯豐著計數d.

銀行股估值方法(1)

今日講ROE 和 Price to book.恆生(#11)於04年底每股資產淨值23.03; 04年度除稅後平均總資產回報率2.2%, 過去5年總資產回報率平均數係2.1%;04年度除稅後平均股東資金回報率係27.6%, 過去5年股東資金回報率平均數係23.96%. 以10/6收市價105.5計, Price to book係4.58倍, 現價買入,以過去5年ROE平均數23.96%計, 資金回報率大約5.23%.中銀(#2388)於04年底每股資產淨值6.481; 04年度除稅後平均總資產回報率1.56%, 過去5年總資產回報率平均數係0.914%;04年度除稅後平均股東資金回報率係18.58%, 過去4年(手上只有4年data)股東資金回報率平均數係12.935%. 以10/6收市價14.5計, Price to book係2.2373倍, 現價買入, 以過去4年ROE 平均數12.935%計, 資金回報率大約5.78%.因為銀行股大部的資產係現金或者接近現金的資產, 包括貸款, 有價證券(股權證券和債權證券)等, 以恆生為例, 現金, 存款證, 貸款, 證券共佔總資產的93.76%, 其他資產包括 物業都有出售價值.所以評估銀行股的價值的方法之一, 可以當銀行股係一張銀行發行的無限年期(no maturity date)的債券. 股東資金相等於債券的票面值(face value), 股東資金回報率相等於債券的票面息率(coupon rate), 因為無限年期, 所以 capital gain or loss 就變成微不足道, current yield 和yield to maturity 接近一樣.如果評級一樣, year to maturity一樣, 票面息率10%的債券, 價值應該高過票面息率5%的債券.例子: 以105的價錢買入票面息率5%, 年期長到capital gain or loss can be ignored 的債券, current yield 係4.762%. 如果一張同等評級, 票面息率10%的債券, 要相同的current yield, 應該賣幾錢呢? 答案係210蚊. 即是話票面息率10%的債券的價錢應該 是票面息率5%的債券的價錢的一倍. 所以解釋到為何ROE相對高的銀行, Price/book 會高過ROE相對低的銀行.目前, 穆迪給予恆生長期外幣銀行存款評級係A1, 而中銀係A2, 低一級.(註: 現實世界, 債券maturity date有限, capital gain or loss can not be ignored, 以105的價錢買入票面息率5%, 仲有10年到期的債券, yield to maturity 係4.372%, 要有同等yield to maturity, 票面息率10%只能賣144.81, 只比105高37.91%, 唔夠一倍)

如何計算銀行Income statement 中的減值撥備支出

銀行會根據客戶貸款情況計出需要撥備的數目：通常分　１）整體減值撥備和　２）逐筆貸款減值撥備．以３３２８為例，０５年整體減值撥備４５．２億，逐筆貸款減值撥備８０．８１億，減值撥備共需要１２６．０１億．但０４年底減值撥備有餘額８４．４６億，所以０５年需要增加撥備１２６．０１－８４．４６＝４１．５５億但０５年write off不能收回的貸款有３．１２億，加上 exchange difference 0.82, 共３．９４億．但０５年也收回原本write off不能收回的貸款有１．０２億，仲有回撥存於同業的減值撥備１．４９億所以０５年需要增加撥備＝４１．５５億＋３．９４億　－　１．０２億－１．４９億＝４２．９８億，會於ｐ＆ｌ中反映．而０５年的減值撥備餘額有１２６．０１億，會carry forward to ０６年．

ROE / (Price to Book) 未必等於 1/PE

ROE / (Price to Book) =/= 1/PE, 因為ROE的 Book value 係平均數, 而Price to
Book的Book value 通常係用最近期的數, 所以正常來講, ROE / (Price to Book) 計出來的回報率係高過 1/PE, 除非間公司的Book value 越來越少.

銀行股睇Price to Book和ROE 之外, 仲要睇資產質素, 不良貸款比率, 和撥備覆蓋率等, 撥備多與少, 足夠與否, 會影響盈利和Book value.

面對跌市

要有一個長遠的眼光, 不要被波動的市場嚇倒, 以一個經營者的心態持有股票, 做 shareholder 而唔係trader.

市場永久是對的嗎?

一間公司的股價, 過去一年的range最高同最低, 可以相差好多. 同一間公司, 一年咁短時間, 基本因素係唔係真係咁大變化? 如果市場是對,咁係最高價是對, 定係最低價是對? 其實變的唔係一間公司的價值, 變的只是人的睇法, 而人的睇法係隨時會變的, 而且好多時都係反映過度.

投資or投機: simple test

想知自己係投資or投機, 問下自己如果持股股價大跌驚唔驚,驚既就係投機, 唔驚就係投資.

真正好的投資

係讓錢為你工作, 而你無需再為投資而操心. 如果投資要經常留意和憂慮大圍經濟環境, 利率走勢, 行業經營狀況, 公司新聞, 管理層的行為, 股市的的情緒, 資金的流動,甚至秋官有無戲上, 咁真係太沈重, 太辛苦了, 可能管理層都無你咁操心.

提升投資的EQ

想提升投資的EQ, 在你覺得恐懼的時候, 訓身買股票直至0%現金, 然後堅持唔賣, 危機過後, 你的投資EQ必然可以提升.

真正的投資行為

應該能夠提供: 1. 資本的安全性 2. 合理的預期報酬 我認為資本的安全性可以來至 1. 公司的清算價值(唔係帳面值), 2. 加上合理的預測盈利. 所以應該選擇財政狀況良好, 盈利穩定, 管理層忠誠的公司. 而買warrnats就睇唔到符合第1個條件. 另外, 期望幾日升50%, 100%的回報, 就唔算合理.

不要捨易取難

股價的走勢很多時係不可預測, 同一件事情, 市場的反映可以好唔同, 有邊個能夠有把握一定估中走勢呢? 如果無把握估中股價的走勢, 就沒有賺錢的把握了. 長線持有優秀公司的股價, 賺錢的把握不是來至估中股價的走勢, 而是來至企業經營的成果, 當一間公司資產值不斷增加, 現金流不斷增加, 股息率不斷增加, 隨著時間的過去, 每股盈利甚至可能多過你當初的買入價. 所以我認為長線持有優良公司的股票,賺錢的幅度未必低過短炒, 但風險卻細好多.

逆轉的訊號

在股票市場, 當大部分人做同一樣野, 大家都賺錢, 咁表示市況就快逆轉.

何謂價值投資

價值投資其實即是買平野. 但無啦啦人地點解要平價賣俾你. 舉例, 如果你有層樓1000萬都大把人爭住要, 你都唔會減價賣800萬. 所以只有趁對方有壞消息的時候, 你先有機會壓佢價. 在股市市場上, 沒有恐慌, 就好難有價值投資的機會. 好多時d人唔敢買貨, 因為只睇到壞消息而恐懼, 但沒有看到股價已經因為壞消息而大跌, 甚至跌過頭. 人們往往會將悲觀的情緒無限放大. 巴菲特曾經當American Express面臨破產危機的時候大手買入股份, 價值投資需要眼光和勇氣. 不過我覺得勇氣佔的比例大好多. 正如sars期間, 你無須什麼特別的眼光去發掘未來明星股, 因為即使人人皆知的優質股價錢都好平, 需要的只是買入的勇氣.

#5 vs #945

以行業計, 保險著數過銀行, 你問銀行借錢, 破產唔還錢, 係銀行損失, 但你供保險,保險公司只係將你d錢投資賺番來的一部分俾你, 如果你斷供, 損失也是你. 不過一般來講, 銀行業的收購對象比保險業多, 保險業多數只靠自然增長.

一間公司的價值

唔會因為股價大跌而下降, 相反也不會因為股價大漲而上升

信心

信心來至公司的價值同你對公司的認識, 唔係股價的走勢. 而一間公司的價值,唔會因為股價的波動而改變. 不要將信心建基於股價之上, 否則當股價大跌你便會信心盡失.

股息從股價中扣除, 所以無著數, 對嗎?

股票的價值係睇公司未來的盈利能力. 匯豐03年每股賺6.54蚊, 派左4.68蚊俾股東, 仍然保留1.86蚊作未來的收購和發展, 所以派息之後匯豐的賺錢能力仍然比以前高,股價再升, 財息兼收係自然不過的事.

牛3 or 熊3

牛3 or 熊3 我會用有主觀成分的市場大眾的信心指數, 加上某d典型的客觀事件支持,但始終要事後才可以證實, 不過我相信自己的判斷. 市場大眾的信心指數, 係有個人主觀的感覺和評估, 由 0 - 100, 越接近0 係熊3, 越接近100係牛3. 要評估大眾的信心, 可以從大眾的兩種心理, 恐懼與貪婪去睇. 當大眾無視股票的價格已遠低於應有價值, 恐懼股價繼續下跌令大眾失去信心買入或持有有投資價值的股票. 例如當日即使你以30幾蚊買#16, 仍然可能心驚膽戰, 仍然有唔少人質疑你是否理智. 持有股票仿似一種折磨, 我認為 大眾的信心指數 已接近 底部. 而客觀的事實會見到大股東出來以大幅高於市價私有化上市公司. 相反, 當市場大眾的焦點係買邊隻會賺多d, 賺快d, 而事實賺錢真係變為容易的事, 賺錢的欲望掩蓋股價是否會因為過高而下跌的恐懼, 大眾的信心指數 已接近高位. 客觀事件: ipo接二連三, 大眾(包括平時唔買股票的人)瘋狂認購新股, 排隊拿認購表格上報紙頭版, 最重要係大家真係賺到錢, 於是認購新股變成抽獎, 期待下一次ipo快d來.HSBC股價創新高....

股價下跌的意義

對於有投資價值的股票, 股價下跌只有一個意義, 就係更有投資價值. 股價的下跌, 並不對一間公司的價值做成負面的影響, 它只會令到付出同樣的金錢, 買得比股價上升時更多的股數, 換句話說, 股價下跌, 令你持股成本更低, 投資者應該歡迎股價持續下跌, 無論你已經持有該股與否. 因為好的生意, 你應該只恨持有股權太少.

本人於sars期間關於#16的post

股票的持有者,例如16新地的小股東,如果現在覺得憂慮,咁係不必要的,因為應該憂慮的係新地的管理層,佢地自然會想法子去應付如今的危機. 如果你對一間公司的管理層沒有信心,咁你當初唔應該買這間公司的股票, 你在投資一間公司之前,應不會預期這公司永遠都一帆風順吧. 不能在逆境中生存的公司係唔值得你投資的. 巴菲特話,當潮退的時候,你才知誰是光著身子游泳. 只有在低潮/危機.的時候,才分別到管理層的優劣, 但這是需要你在買股票前考慮的. 所以如果你買的係優秀的公司, 現在無需擔憂, 放心交給管理層去應付可也.

對於優質股來說

當股價向上升時, 越來越大係風險, 而不是報酬; 相反, 股價向下跌時, 越來越大係報酬, 而不是風險.

投資賺錢的期望

作為匯豐的股東, 我只知道每股資產值逐年增加, 股利也逐年增加. 我對從匯豐身上賺錢的期望來至匯豐出色的經營成績, 而不是來至估中股價走勢而炒賣匯豐的股票.

投資要有好成績

投資要有好成績, 要學如何不用止蝕. 同如何運用恐懼與貪婪. 投資成績唔好的人, 通常0係應該恐懼的時候貪婪, 應該貪婪的時候恐懼.

股價

股價短期由情緒主導, 長期由盈利和有價資產決定, 可惜抱長遠眼光的人太少了.

短線投機 vs 長線投資

短線投機的缺點是要靠經常睇0岩市才能賺錢, 難度很高, 長線投資只要選對好股, 加上時間的威力, 就能賺大錢. 短線投機 timing 好重要, 長線投資 time 重要 過timing.

開張大吉

趁下熱鬧, 我也開個blog, 不過目前太忙, 未有時間寫新的東西. 暫時只能整理一下以前寫下的舊作.