星期三, 7月 16, 2008

一些回應(婚姻篇之一)

最近多左唔少留言係關於婚姻以及兩性相處之道. 呢個範疇筆者仍然在學習階段, 不過都可以分享交流下. 所以來緊會選擇一些網友的留言逐一作回應.

不過, 回應之前想講下面對目前的市況, 筆者的一些睇法和應對的做法. 呢幾日市場的焦點之一, 係房利美(Fannie Mae) 以及 房地美 (Freddie Mac) 的"兩房"債券, 財經傳媒係度估計金融公司包括銀行和保險公司, 邊間持有兩房債券, 以及持有幾多金額. 筆者就認為唔需要咁恐慌, 畢竟"股權"與"債權"係有好大分別. 舉例, 如果一間金融機構, 例如銀行, 因為 要補充資本而發行多d股票, 咁現有股東的"股權"會被攤薄, 但該公司的債券持有人的債權係唔會被攤薄. 換句話說, 如果該公司發行一倍的股票, 咁現有股東的權益會被攤薄至一半, 但現有債券持有人的權益係無任何影響, 除非發生信用違約(credit default), 例如該公司唔再派債息, 甚至在債券到期日唔將債券贖回. 但相信兩房發生信用違約的機會極低, 實在無必要自己嚇自己.

面對現時的市況, 筆者重申, 會維持100%持股, 無論股市繼續下跌幾多千點都好, 筆者都會繼續持有永久組合, 一股都唔會沽, 因為, 應該恐懼係在股市瘋狂大升的時候, 而唔係現時低迷的時候. 另外, 筆者會繼續月供股票, 下個月開始, 更加會提高月供金額到20,000蚊, 月供股票係長期(指十年或以上)的計劃, 無必要因為短期的股市波動而中止. 最後, 想講, 熊市最重要係保住份工作, 除非你已經財務自由. 因為, 有工作, 才有收入, 有收入, 才有現金流繼續投資. 所以, 有工作, 就有希望. 財務自由, 係馬拉松而非短途賽.

以下係回應網友無名士的留言.

無名士留言:

我初頭都同意令另一半開心幸福就係幸福. 我除咗工作之外, 又會煮嘢俾佢食, 希望唔使佢做家務. 佢鍾意食我煮o既嘢的同時, 佢又嫌我好 family man. 佢叫我俾多啲時間在工作上. 自問我在工作方面都好努力, 我老細都放手俾我做好多嘢, 但並唔係即刻話可以升職加人工嗰隻. 有時對住女人, 又唔係咁易發佢脾氣, 但佢咁講自己又唔開心. 唉...


筆者回應:

其實, 另一半對自己有要求係好事. 想像一下, 如果有日, 另一半對你完全無寄望, 無要求, 你鍾意點都由得你, 你真係會開心d嗎? 正面d睇, 另一半對自己有要求, 代表佢仍然覺得你有希望, 仍然覺得你有能力. 再舉個例子, 如果有父母對年幼的子女講, 我地對你唔敢有乜要求, 只要你大個後無被人拉去坐監 我地已經好安慰了. 咁樣對小朋友來講, 也未必係好事.

此外, 筆者認為另一半係自己最親,最愛的人, 自己未來的日子, 尤其是晚年的日子, 就係同佢一齊渡過, 應該互相守望, 互相扶持. 所以, 即使佢有多d要求, 就當係逗佢開心, 滿足下佢, 自己多行幾步, 無所謂. 筆者最近有一種觀念越來越強烈, 就係, 一個家庭要快樂, 首先要令老婆快樂, 家庭和諧溶洽就水到渠成. 讓大家努力去保持起初對另一半的那一份愛, 永遠新鮮和歷久不衰吧.

台灣yahoo: http://tw.myblog.yahoo.com/mr-market/
新浪Sina: http://graham_choi2003.mysinablog.com/
香港yahoo: http://hk.myblog.yahoo.com/mr-market/

7 則留言:

  1. 月供我都會加注!加多2500

    如果我地有機會玩次大富翁應該好好玩.

    無負債,有現金流,無margin. 跌市吃眼前虧都無有怕.

    回覆刪除
  2. Mr. Market,

    I came across your blog by chance when I went back to HK in March this year. It's been really enjoyable reading your blog as I share your views of investment and life attitude.

    I'm impressed to learn that there is still such a man out there (you are the dinosaur) like you who knows how to love a woman!!! I'm sure all the girls would love to find a man like you one day...

    Congratulations to your marriage!

    回覆刪除
  3. 兩房資不抵債噃!!

    回覆刪除
  4. 你講關於結婚既嘢不無道理﹐不過有個好大嘅假設你無講﹐就係你對老婆好﹐個老婆一定對你好。呢樣嘢我就覺得唔係必然啦。可能我見得太多大小姐同埋老馮啦!對人地就要求多多﹐對自己就要求低低﹐只識嫌人地﹐唔識嫌自己。見到呢種人﹐唔知你仲想唔想令她幸福﹖抑或想她合家富貴呢﹖

    回覆刪除
  5. 回應ngkf: 無負債,有現金流,無margin. 跌市吃眼前虧都無有怕 => 絕對認同

    回應無名士: 多謝賞面.

    回應Raymond : 即使資不抵債, 可以注資, 唔等於會有 credit default 發生.

    回應MC: 下次會詳細回應你.

    回覆刪除
  6. Sent a email to you. Can you please have a look?

    回覆刪除
  7. 回應無名士: seems that I don't have permission to delete now.

    回覆刪除