星期二, 7月 08, 2008

市淡, 心淡

個標題並非指筆者的心態, 而係指筆者所見所聞. 事實上, 筆者現時仍然100%持股, 無意沽出任何一股. 熟悉筆者的朋友會知道, 只有股價升到好離譜的貴, 筆者才會恐懼, 或者心淡. 相反, 股價越大跌筆者只會越精神, 越興奮地買, 現時的市況, 筆者當然唔會心淡, 心雄就會.

今日筆者放一日假, 昨天以為今日會繼續落雨, 所以無計劃特別做d乜. 結果, 中午無落雨, 又無太陽晒, 感覺幾好. 趁今日放假, 筆者當然要陪女友飲中午茶, 順便去證券行將前一排買入的2888渣打集團, 以及加碼買入的2628國壽和3328交行提貨轉名. 去到股票行, 嘩, 水靜河飛, 幾乎見唔到有乜散戶坐係度, 連電話聲都無乜聽到. 睇來大市每況愈下, 持續的疲弱表現, 已經令到散戶的熱情冷卻, 甚至心灰意冷. 現時個市況用"熊市"去形容唔夠貼切, 現時係"淡市", 心態冷淡, 筆者有些朋友現時已經對股票失去興趣, 對手上的持股不聞不問. 未敢去問(收市價), 不堪回首(3萬2). 所謂久病床前無孝子, 股市就像久病之人, 散戶就像床前的孝子, 股價急速的下跌, 未必會打擊到熱情與鬥志, 仍然可以高呼好公司有買貴, 無買錯, 長線投資. 不過, 如果股市一年, 兩年都久沉不起, 散戶就有可能會死心, 最後, 再來一段持續的大跌, 就好似年初二晚煙火匯演的最後5分鐘, 持續不斷向上發炮, 頭上的煙花前仆後繼的展開, 七彩繽紛, 爆炸聲震到耳仔差不多撞聾, 口裡卻不期然地發出陣陣嘩嘩聲. 咁散戶就會由"死心"變"嘔心", 想起股票都想作嘔, 發惡夢, 要不計價沽至一股不留, 才得到完全的解脫, 咁就差唔多係另一個牛市誕生的時候了.

之後見到余若微在天橋上派宣傳單張, 路人反應唔算積極, 伸手問佢拿宣傳單張的路人唔多. 記得幾年前筆者曾經在位於置地廣場43樓的香港銀行家會所食午餐, 當時係筆者首次見到余大狀, 佢俾我的感覺, 係好溫文優雅, 好有修養. 今次筆者走近余大狀接左佢的宣傳單張, 然後同佢講支持的說話, 余大狀好有禮貌, 面帶笑容地講多謝. 余若微係資深大律師(Senior Counsel), 競選名單排第1位的陳淑莊係大律師(Barrister), 競選名單排第3位係一位CPA. 在香港,律師分為事務律師(Solicitor), 和訟務律師或大律師(Barrister). 大律師一般必須以個人身份行業,承擔無限責任的風險,而不能隸屬於任何合伙律師事務所或者公司。根據维基百科的資料, 大律師在累積十年經驗後有機會被香港終審法院首席法官委任成為資深大律師(Senior Counsel),而所有在主權移交前已獲認許為御用大律師(Queen's Counsel)的香港大律師,在香港主權移交後全部自動獲得香港資深大律師的資格。截至2007年3月香港資深大律師共只有78人, (71男、7女)。

之後, 筆者繼續減肥大計, 去左某會所的健身室做跑步機. 跑左一個左右, 沖完涼, 就舒舒服服在會所睇一陣報紙和雜誌. 睇到壹周刊有篇講到資金乾塘,樓市向下. 筆者認為股市不振樓市也唔會好得去邊, 筆者唔認為股市和樓市可以decoupling. 所以如果有人睇淡股市, 卻走去買樓, 以為股市唔掂而樓市可以獨善其身, 筆者就不敢苟同. 有人話去酒店問, 知道今年多人結婚, 所以樓市會掂. 筆者就認為, 其實年年都有唔少人結婚, 樓市卻有升有跌. 多人結婚只可以話有住屋需要, 但住屋唔等於要買屋. 況且樓市如果靠用家, 唔慌升得起, 你去有新樓盤銷售的地方問下d買家, 買得最豪氣最多個d, 有幾多個係等緊個新單位要自住. 再講到租金上升可以帶動樓價上升, 筆者也唔認同. 筆者覺得租金係由樓價帶動而非前者帶動後者. 需知道持貨(指物業)係需要成本, 因為沒有資金係免費的. 即使full payment唔使供, 仍然有機會成本, 你唔買樓的錢拿去買無風險的國債都有幾厘息收. 如果要供接揭更加唔使講. 當樓市好景, 樓價上升, 業主預期3個月樓價可以升十幾二十percent, 當然對出租一年才得到4,5厘的租金回報無興趣, 甚至有業主等到租約期滿收樓放賣盤. 於是租盤買少見少, 自然隨樓價上升. 但一旦樓市逆轉, 牛皮一段時間, 甚至樓價下跌, 唔少業主就會放租幫補持貨成本. 所以樓價下跌, 租金一樣會被帶動下跌. 筆者認為d人願唔願意買樓, 主要唔係睇供求(市場上可以出售的單位永遠會多過需求), 唔係睇新樓動工量(市場上未賣的一手樓加上待賣的2手樓永遠會多過需求), 唔係睇租金(樓價跌, 租金一樣會跌, 所以租金唔會成為樓價的支持), 唔係睇利率(幾高的利率都有人願意買, 相反, 幾低的利率一樣可以無乜人願意買樓), 其實買唔買樓, 主要係一個信心的問題. 無信心, 有錢都唔敢唔願意買, 有信心, 借錢都仆倒去買.

總結一句, 租金係供求的問題, 樓價卻是信心的問題. 即係話, 供求決定租金, 信心主宰樓價.


台灣yahoo: http://tw.myblog.yahoo.com/mr-market/
新浪Sina: http://graham_choi2003.mysinablog.com/
香港yahoo: http://hk.myblog.yahoo.com/mr-market/

13 則留言:

  1. 市場先生,

    其實照咁睇,不如等個市跌定,所謂「之後個一年, 兩年久沉不起」先平均慢慢供股同入市,咪仲好過而家貪心/心急估底入市?

    因為我之前大升市一直冇持股,而家手持現金反而變得貪心,但同時亦恐懼調整會比想像中深。

    回覆刪除
  2. 時間好快過的,個市越淡就越多機會。

    回覆刪除
  3. 今日我又係放假.. 係東亞先到兩個阿婆拿了不知明招股書.(好明顯係當費紙咁拿). 仲有好大堆無人問津.

    之後經過Sun Po Kong, 見到工商銀行security 入面十幾二十圍起一兩個人唔知做乜,好似批緊人咁.

    行多兩步,見到一間經紀行入面, 十幾部機得3個人坐.

    令我諗起87年10月,在街上見到好多傻佬.以前讀緊書根本唔知係一回乜野事.

    回覆刪除
  4. 先生.想同你分享下買2888的心路歷程。

    小弟今日又於216入左第四注2888.平均價係245左右.平均不算好價.而且手上現金都用得「九九十十」了。
    本人於去年六月開始入2888的. 當時價值係252. 後來佢升到上三百蚊樓上我都無沽. 現時回想當然好似好傻仔.但既然一開始就打算長線持有.升兩三成唔會沽. 跌兩三成都唔會。
    唔知小弟係咪開始唔識死. 最近都有點市場先生以前BLOG中提及的「麻木感」....看着5.2888.3968.2628.2318等大幅縮水.我仍然無乜感覺. 每個月一出糧有錢就儲起, 見平就買.另一邊就繼續月供。
    2888現時不少大行都睇三百蚊以上.就連主席都話08年上半年業績非常強勁. 我都覺得佢從未到價/超越應有價值(否則我沽左了)...咁如果一件值三百幾蚊的衫, 二百衫都唔買, 幾時買呢?
    我唔知股市的底會係點. 有人話2888可能見180. 唔出奇. 但到左那日.我有錢仍會再買。
    好似買衫一樣. 七折買左之後可能半價. 半價之後可能三折添. 無人知幾時係最低價.我只係知. 自己覺得合理又抵買, 我就會買。因為可能今日唔買,聽日FINAL SALE 完畢. 換季了, 我又要用返正價買貨。

    示風

    回覆刪除
  5. Great article, I share the same view on the property market.
    Its heart breaking seeing some other bloggers buying property base on those nonsense excuses you mention.
    I wish I could write as good as you.
    Thank you.

    回覆刪除
  6. 我不想自欺欺人, 好股係熊市月供就可以.

    回覆刪除
  7. 各位,和大家分享一點讀書心得。Jeremy Siegel在他的The Future for Investors (Crown Business, 2005) 中指出,在1957-2003中間,S&P500的所有企業中,回報最好的公司,是Philip Morris,即生產萬寶路香煙的公司,年均回報是19.75%,而標普的平均每年回報是10.85%。Philip Morris絕對不是盈利增長最快的公司,股價更因為香煙官司而大起大落,但它的回報卻遠遠拋離其他公司。

    秘密在哪裡?Siegel 這樣解釋:

    “The super returns in Philip Morris illustrates an extremely important principle of investing: what counts is not just the growth rate of earnings but the growth of earning relative to the market’s expectation…The lower expectation combined with high growth and a high dividend yield provide the perfect environment for superb investor returns. ” (p.35)

    Sigel在書中再提出了一個基本的回報原則:

    “The long term return on a stock depends not on the actual growth of its earnings, but on the difference between its actual earnings growth and the growth that investors expected.” (p.41)

    簡言之,投資回報的高低的關鍵,在兩點:1. 市場對於該公司的預期增長與實際增長之間的差異;2. 股息的高低,以及股息的再投資。

    如果市場對於一家公司的預期增長遠遠大於它的實際增長,那麼它的估值便過高,也即P/E過高,股息率便會偏低,利用股息再投資的速度便會很慢。如果相反,該公司便會估值便宜,如果同時派發高息,該公司或許盈利和股價沒別人升得快,但最後的回報卻遠遠大於其他公司。這類公司,在熊市時是Bear Market Protector,在牛市時是Return Accelerator。道理很簡單,熊市時派息不減,累積的股數增加。待到牛市時,這些增大的股票便會將回報加快。

    Philip Morris的成功的秘密在這裡,其他回報最高的19家公司的秘密也在這裡(包括Pfizer, Coca-Cola, Pepsi等)。Philip Morris的平均P/E 是13.13,平均股息是4.07%。

    要得到這樣的回報,我認為有幾個條件。1. 這家公司不會倒閉;2. 持續穩定的高派息;3. 估值合理時買入;4. 無論熊市牛市,都不離開市場;5. 將股息再投資。

    Siegel的研究,也告訴我們:
    1.不要將目光只放在盈利及股價的增長上,那並不保證你有好的回報,因為當市場人人都那樣看時,該公司的估值會長期偏高,從而導致回報減少。應該選擇低P/E,派息高,管理好,有穩定增長的公司。

    2.不要害怕熊市,對於低P/E,高派息的公司,熊市正是你累積股票的良機。甚至可以說,熊市時間愈長,你的長遠回報愈大,前提是你要堅持下去,不離開市場。

    Siegel透過對1802-2003的美國股市統計告訴我們,在扣除通賬後,股市的年平均回報是6.5-7%。具體點說,如果你在1801年投入1美元於股市指數,到2001年時將是$597485,債劵是1072,黃金是1.39,手持現金則將變成0.07。所以,Siegel的其中一個建議,是將50%資金投資在指數基金。Siegel又稱,他的研究發現同樣適用於其他國家。因此,將資產長期投資在股市,回報最高,風險卻最低。

    我知道,Siegel的結論,無論多麼合理,身在股市中的人,都不易實踐。理由不難理解,因為投資者都相信自己有高賣低買的能力;也因為我們都是人,都有情緒,很易受無數外界的訊息影響。而我們對於企業的認識和對於歷史的理解,不足以令我們有足夠信心從事長期投資。

    但在目前悲觀的氣氛中,Siegel的研究,是可以給我們一點信心的。而類似Philip Morris的公司,就在我們身邊,其中的一家,我相信便是HSBC。如果你對HSBC也不夠信心,長期的定期投資指數基金(例如盈富基金),也一定會帶給你可觀的回報。

    以上只是個人的讀書分享,歡迎指正。

    回覆刪除
  8. 記得中學經濟課讀過租金決定物業價值.但從日常生活所見及財經節目所知,情況又好像剛剛相反.不過我想提出一個問題,假若我住的那層樓有A,B及C室.那三個單位條件完全一樣,但A室的租金就比其他的單位高兩成.我可以肯定A室的樓價一定比其他的要高.這例子又好像說明經濟課本的對的.

    我覺得樓價跌的基本原因是經濟前境不明朗(高失業,股市跌,所有收入來源減少),導致租客付租能力下跌.由於租金下跌,最後物業價值跟著回落.
    經濟(落)->收入(落)->租金(落)->樓價(落)

    但日常生活所見樓價總比租金先行.這情況可能是因為對租金有所預期.好像大家都預計一間公司來年的營利(租金)會大升,今日的股價(樓價)早已反映大家的預期了.

    回覆刪除
  9. 『其實買唔買樓, 主要係一個信心的問題. 無信心, 有錢都唔敢唔願意買, 有信心, 借錢都仆倒去買.』
    係呀,我都係租樓往,我對於股市嘅信心大過樓市好多。

    再次番睇你嘅書,又有新嘅體會,2006-10-2你曾經話自己沈迷賭博,可否分享吓當時嘅情況,後來又點樣抽離呢?

    回覆刪除
  10. I would like to say thanks to Mr. Market as you provide me another angle to look at the property market. Recently a gang of bloggers has good view on the property market. I really need somebody (who has good reputation) to show me the other side of the coin. Thanks again.

    回覆刪除
  11. 市場先生,小弟有幾個關於買賣股票問題想問下先生:
    1. 經銀行和証券行買賣股票有甚麼分別? 証券行佣金會低一點嗎?我現在用 hsbc 的網上理財,覺得好方便,不過唔知收費係咪偏貴
    2. 先生是將股票轉名再把實物股票提出來保存嗎? 我知道這樣會省去銀行代收股息的費用和存倉費,但儲存實物有危險嗎? 遺失了可以保領嗎? 費用會否很高?
    3. 股票以自己名義儲存,派息是會寄支票來嗎?
    4. 以自己名義儲存股票,會定期收到公司的年報和其他資料嗎? 我可以選擇以電子形式接收嗎? 因為定期收一本厚厚的書我個人覺得很不環保,我 prefer online 睇
    5. 例如 hsbc 可以以股代息,我可以下指令選擇以後都以股代息,令他不會每次派息都寄信來嗎? 又係環保問題..

    回覆刪除
  12. 回應鎚: 無人知個市幾時跌定, 幾時見底. 其實也唔需要去估, 只要股價低於合理價, 已經可以分段買入. 現時我係100%持股, 但即使股市繼續下跌, 也無問題, 仍然可以繼續儲錢繼續收集. 優質股票最終會為我帶來財息兼收的美好成果.

    回應大口仔 : 我一d都唔擔心個市.

    回應ngkf: 大部分人對股市無興趣的時候, 就係值得對股市有興趣的時候.

    回應示風: 除非股價到了非常瘋狂的高位, 咁可以考慮沽出, 否則可以一直持有優質股.

    回應摸石過河和無名士 : 多謝欣賞.

    回應cory: 對於你全線撤退, 我覺得有d可惜. 全民皆股, 股市瘋狂才是撤退的時候. 現時反而係進場的時候.

    回應逍遙 : 多謝你的分享, 呢本書我都睇緊.

    回應艾廸仔 : 多謝留言.

    回應skm: 有機會我再分享多d自己脫離病態賭徒的經歷.

    回應Yeung : 我未試過經銀行買賣股票, 唔計月供稱股票. 我的永久組合全部會提貨轉自己名, 然後放入保險箱, 未試過遺失股票. 派息會自動轉帳入我的銀行戶口. 我會定期收到公司的年報和其他通告. 一般可以選擇以電子形式接收. hsbc 的派息,可以下指令選擇以後都以股代息,但每次仍然會寄信來通知我.

    回覆刪除
  13. We're a gaggle of volunteers and starting a new scheme in our community.
    Your site offered us with helpful info to work on. You've performed a formidable job and our entire neighborhood will probably be grateful to
    you.

    my web page ... garcinia cambogia where to buy

    回覆刪除