星期日, 3月 16, 2008

好股票要像心愛的古董一樣珍藏

星期五美國道指下跌194.65點, 匯豐於美國ADR股價下跌3.27%, 原因係繼凱雷資本無力償債後, 美國第5大投資銀行貝爾斯登宣布面對流動資金不足的問題, 股價一度跌超過50%,收市亦跌47.37%, 貝爾斯登過去52週股價最高係159.36美元, 昨晚最低跌到26.85美元, 跌幅係83.15%, 一間美國第5大投資銀行的股價可以跌到咁, 驚唔驚.

雖然, 貝爾斯登係美國第5大投資銀行, 但其實佢只係2線的投資銀行, 佢現時的市值只有35.4273億美元, 相等於276.33億港元, 本地銀行東亞市值係657.58億港元, 係貝爾斯登的2.38倍. 現時美國以市值計最大的投資銀行係Goldman Sachs, 市值619.7711億美元, 第2大係Morgan Stanley, 市值436.8859億美元, 第3大係Merrill Lynch, 市值421.6149億美元, 第4大係Lehman Brothers, 市值216.9947億美元. 以前仲有一間出名的投資銀行Salomon Brothers, 係美國債券市場的翹楚, 於1997年被Travelers收購, 與旗下的Smith Barney合併為Salomon Smith Barney. 1998年Travelers與Citicorp 合併成為今日的Citigroup.

講番現時的股市, 從報紙或電視或收音機, 可以見到或聽到財經專家的口吻已經同去年年尾唔同晒, 現時的股民的心態也唔同左, 對後市不再寄予厚望, 甚至有輸少當贏的心態. 事實上, 目前仍然持有股票的人, 唔少人帳面上同之前的高峰比較, 唔見左相當一大部分, 筆者也唔例外. 不過, 筆者認為唔好灰心和失望, 優秀企業的股票應該像心愛的古董一樣珍藏, 繼續持有, 不斷收集. 最重要係檢視手上的持股, 是否盈利前景美好的企業, 否則, 就要趁市況低迷時期, 優化股票組合, 換馬至優質股. 只要手上持股全部係能夠不斷為股東賺取盈利, 就唔使擔心, 做一個輕鬆和安心的股票收藏家和股東. 現時筆者差不多係100%持股, 無意減低持股比例, 對匯豐更加係由始至今, 一片丹心, 不過,我從來無懷疑過自己係天真及傻, 我真係從未失去起初的信心和信念.

台灣yahoo: http://tw.myblog.yahoo.com/mr-market/
新浪Sina: http://graham_choi2003.mysinablog.com/
香港yahoo: http://hk.myblog.yahoo.com/mr-market/

8 則留言:

  1. 看來我對平保既堅持與你對匯豐既忠心差唔多了...... 希望我唔係傻仔一名吧.

    回覆刪除
  2. 回應Cory : 當日2318平保股價12個幾的時候, 市場只有少數人睇好, 我和你係其中2個, 我對2318的管理層仍然充滿信心, 我會趁機會繼續加碼增持.

    回覆刪除
  3. 我都仲渣住2318, 希望我也不是傻仔吧.

    回覆刪除
  4. "目前仍然持有股票的人, 唔少人帳面上同之前的高峰比較, 唔見左相當一大部分, 筆者也唔例外" , 睇到呢幾句, 我突然覺得無咁孤獨,希望持有好股既人, 能夠堅持!

    2318, 12個幾時, 我也跟先生入了兩手, 初時只想升少少就換去 2628, 但後來覺得2318 都係好股, 越持有越喜愛, 所以持有至今. 忍不住,還要多謝當日响 forum 的各位朋友.

    一齊努力吧 !

    回覆刪除
  5. 傻唔傻要睇將來賺到嘅錢嚟決定,不過肯定呢個諗法唔算係天真。
    我都有3500股

    回覆刪除
  6. 我會記往先生的教誨

    ↓↓↓↓↓↓↓↓↓↓↓↓↓↓↓↓↓↓
    投資致勝之道: 在別人恐懼的時候你要變得貪心; 在別人貪心的時候你要變得恐懼 - 巴菲特

    回覆刪除
  7. 係天真傻, 我覺得要睇乜時候。
    高位入市係天真, 低位沽左係傻....但如持有三幾年回升返又未必傻得晒.....
    或者28000-32000無減持股票係天真....但當時無減的話,就唔應該响現時20000點先黎減, 因為股票價值已慢慢反映緊了。
    示風

    回覆刪除
  8. 回應隨笈 , ee, skm, 示風: 目前我100%持股, 面對大跌市我一股不沽, 仍然唔擔憂, 共勉之.

    回覆刪除