取捨

網友monkey23話最近沽出的股票全部都再急升, 那種唔開心真係幾難頂, 雖然佢明白自己在做什麼, 只是那種早沽的感覺的確很難受呢! 問我點樣去面對這種心態.

我首先舉個例子, 買人壽保險係一種風險管理, 係一個風險轉移的做法. 但你唔能夠又要自己平安無事, 又要對保險公司賺左你的保費而唔開心. 所以你唔能夠又要100%持股賺到盡, 又要在股災來到的時候有大量現金買平貨. 人生的現實係要"取捨". 想想點解巴菲特要沽857, 有人話係因為巴菲特有投資項目等錢使, 唔好講伯克希爾手上仍然有多現金, 就當巴菲特真係等錢使, 點解唔沽可口可樂, 唔沽吉列公司, 唔沽美國運通, 唔沽富國銀行, 只係沽857? 有人話係因為政治理由, 如果真係因為政治理由, 咁就應該不計價全部沽出, 一股不留, 咁點解之前巴菲特要交俾股東大會去投票決定, 股東決定左唔沽之後先來沽? 巴菲特持有857的平均成本即使唔計收到的股息只有1.6至1.8左右, 難道巴菲特認為857的股價會跌穿佢的成本價? 現時人人都幾乎識講油價可能升到100蚊, 857又不時發現新油田, 857錢途一片光明, 點解股神仍然要沽貨?

無人知股市的頂部在哪裡, 可以升到幾多, 同樣, 也無人知股災幾時會來. 可行的做法係減持一部分股票, 保留多一些現金, 現時我自己股票與現金的比例大約係70%比30%, 如果股市繼續上升, 70%的持股仍然可以為我增值, 如果大市逆轉, 我有30%現金買平貨, 進可攻, 退可守. 無需因為賺少左而唔開心, 錢係賺不盡的.

最後, 補充一下, 仍然認為月供股票係長期的計劃, 無需改變. 我仍然月供8000蚊, 分別係3328, 3968各2500蚊, 2318, 2628, 945各1000蚊.