星期四, 4月 02, 2009

對投資回報的回應和澄清

有網友留言, 話筆者投資左咁多年,仲跑輸大市咁多, 應該要檢討一下策略.

首先多謝網友的提醒, 筆者絕對同意要不時檢討總結經驗和教訓. 不過對筆者多年的投資回報需要作一些澄清.

筆者的永久組合於2001年911事件之後建立. 到今日為止, 筆者的永久組合市值 大約2.75Mil, 當中包括還未收到的匯豐供股8,046股, 不過由於支票已經過左數, 匯豐現時的股價也已經因為供股權而調整左, 因此計埋也是合理的. 到底筆者實際真金白銀拿出來建立永久組合的金額係幾多呢? 計埋今次供股的廿幾萬, 大約1.5Mil. 為何整個永久組合的真正成本仲低過筆者之前透露的持有19,312股匯豐的成本1.54Mil呢?

原因是7年以來, 筆者投入匯豐的成本有相當部分來自買賣股票賺回來的利潤, 以03年沙士期間為例, 筆者大量買入地產股, 包括33蚊左右的16新地, 18蚊左右的12恆地, 4蚊以下的41鷹君, 也買中左曾被私有化的626JCG, 683嘉里建設, 賺到數以倍計的利潤, 呢d錢最終都用來買匯豐, 因此視乎如何定義投資成本. 筆者用買賣地產股賺到的數十萬利潤買入匯豐, 呢批匯豐的成本是零還是數十萬呢? 見仁見智.

再講另一個例子, 永久組合的中資金融股, 筆者買入這些中資金融股的始初成本都很低, 6蚊以下買2628國壽, 13蚊以下買平保, 2個幾買3328交行. 於07年第4季, 筆者減持30%股票, 當中全部屬於這些低成本的中資金融股. 如果6蚊買2628國壽, 46蚊沽出, 然後28蚊買回, 那麼, 成本應該是28蚊, 6蚊, 還是零呢? 無論點計, 筆者永久組合的中資金融股仍然利潤豐厚.

另外, 筆者並非於7年前一筆過投入1.5Mil建立永久組合, 而是7年來期間不斷投入新的自有資金, 加上買賣股票賺到的利潤再投資, 以及股息收入再投資, 仲有部分買賣股票賺到的利潤流失去自置物業身上以及籌備婚禮等.

總結, 筆者建立永久組合這7年來的投資回報絕對是正數, 當然, 如果同股市3萬2千點最高峰時的市值比較, 回報下跌了不少, 但只是賺少左, 無損正回報的結果. 不過, 咁多年來永久組合的實際投資回報率是多少, 筆者真係計唔掂.

台灣yahoo: http://tw.myblog.yahoo.com/mr-market/
新浪Sina: http://graham_choi2003.mysinablog.com/
香港yahoo: http://hk.myblog.yahoo.com/mr-market/

24 則留言:

  1. 老實說,大部份的人真的很無知.我留心看了市場先生的blog有一年多.欣賞先生的堅持.相信未來的日子,香港巴菲特非你莫屬.完全是價值投資的精神.

    回覆刪除
  2. 同意無名氏所言, 我雖然不大認同先生的組合過於集中銀行股, 但絕對相信長期投資優質股比短線炒賣風險低而利潤高, 何況人人投資背後的理念不同, 無須否定別人的方法, 我一直很欣賞先生的堅持, 令我獲益良多

    回覆刪除
  3. 十分欣賞你一直堅持個人理念, 以及用踏實心態進行投資, 繼續努力 :)

    回覆刪除
  4. 看這個blog真學到很多財經知識, 這比起知道你贏輸幾多有更大意義, 也才是真正的意義所在。

    回覆刪除
  5. 筆者太過側重銀行及保險股,呢兩類股份是今次的重災區,唔知何年何月才返家鄉!

    另外,好多人誤解「巴菲特」的「價值投資法」,並不是買入後死渣唔放,而係低位買位入,長期持有,善價而沽,例如,「中石油」便是一例。

    另外,巴菲持會低位大量買入公司股份,從而得到公司的控制權,然後,派人管理公司,以便改善公司的業務及業績,使公司的價值及股價得以提升,最後高位賣出股份套現。呢D方法,唔係我們可以做得到,因我地根本冇咁多錢。

    最後,巴菲特今次都輸左很多錢,不過他財力雄厚,只是賬面上的損失(而且,有很多是他旗下的基金,不是他全部私人的),佢依然咁有錢,可以繼續守下去,就算咁唔好彩,損失大半,佢仲有大把後備資金。呢D係我地小散戶戶做唔到,我地好易一舖清袋,守唔到幾耐!

    市場先生,恕我多言,得罪了!

    回覆刪除
  6. "不過, 咁多年來永久組合的實際投資回報率是多少, 筆者真係計唔掂."

    If you use Excel, the function "XIRR" would help you figure this out. It calculates the annualized internal rate of return based on the dates and amounts of cash inflow/outflow.

    回覆刪除
  7. 巴克萊:本港今年經濟負增長3.5%,看淡港股
    4月 2日 星期四 16:42 更新

    巴克萊亞洲董事兼中國研究部主管譚文生表示,將本港的經濟增長預測由負增長3%,調整至負增長3.5%,因為香港屬開放型經濟,容易受到外圍需求放緩影響,預計至年底才開始輕微復甦。他認為,本港失業率會升至超過6%,影響消費意慾,而豪宅價格預料進一步下跌。
      
    另外,巴克萊資本亞洲新興市場經濟研究部主管Peter Redward表示,由於受到地產及銀行業疲弱的影響,看淡香港股市,建議減持恆指。(da/a)


    【投資策略】巴克萊料環球股市上升屬反彈,惟籲趁回吐吸納
    2009/04/02 14:37

    巴克萊新興亞洲研究部主管雷德沃表示,預期環球股市經已見底,但相信近期的上升只是反彈,未來股市仍有可能在低位徘徊或回試低位,並建議投資者可以開始慢慢吸納股票。

    巴克萊中國研究部主管彭文生則預期,內地A股市場已經見底,但強調不是牛市重臨;而近日港元持續強勢,反映有資金流入,主要美元疲弱,以及海外資金通過香港買入H股所致。

    此外,雷德沃表示,美元持續疲弱,看好商品及黃金相關股份。


    同一家大行,同一日有兩種相反言論……服未?先生有乜睇法?

    示風

    回覆刪除
  8. 關於計算方法,東尼在壹仔都係用同一計算:97年拿100萬出來,其間多次換馬後計算總回報都係以100萬做基數 - 畢竟100萬先係真正付出;

    當然如果加入自97年後的通漲/縮以求實質回報會更好!

    回覆刪除
  9. 價值投資唔等於死揸唔放,長線投資係要基於公司有不斷上升既內在價值,以往匯豐盈利派息年年大致平穩上升,內在價值當然一路上,推高股價.但而家派息少左一半,仲要唔係一兩年可以回復番去07年既水平,用discount dividend model已經可以知道合理價值會大幅下降.明知價值下跌仲一路hold,就大大浪費增加股數既機會.投資無非係想賺錢,提早財務自由,要做到呢樣,選股亦好重要,唔少國企呢年遠遠跑贏匯豐同宏利(即使已經跌左好多).如果肯換馬,回報肯定比而家高以倍計,說不定今日已經達成目標.

    回覆刪除
  10. 先生今日唔講,我真係以為你咁多年都只係買果幾集股票。

    回覆刪除
  11. Mr. Market

    You have built a very good portfolio. Let's celebrate when the crisis is over!

    回覆刪除
  12. 我想長線投資都不一定基於 不斷上升既內在價值
    如果有讀過 巴菲特師父ge 作品 應該會明白 價值投資 唔係基於對未來增長ge 預期
    而係先有現在ge 價值 才考慮其他因素

    我諗作為價值投資者 如果認為投資成敗決定於巿場ge polling system 很可能會慢慢傾為投機
    不竟 冇人清楚知道未來會發生d 咩野
    今日睇番尋日 股巿跌左 錯失左高價出貨機會
    但係聽日 可能個股巿 又已經升穿前日ge 高位
    你預期聽日會跌 聽日亦都有機會會升
    如果隨便就放貨 我諗投資 就會變成投機

    雖然我好欣賞巿場先生ge 知識
    不過我個人都唔係好認同 巿場先生 投資手法

    另外 我知道巴菲特 買番黎ge 公司 通常都會先由賣公司比佢ge 原先擁有者做CEO
    所以去到今時今日 佢ge 管理團隊大多數出現年紀問題
    巴菲特 曾經講過 擁有一間公司直到永遠 係最理想ge 持股時期
    如果以一個老闆ge 角度去睇投資呢件事
    巿場先生 唔賣股份 唔見得有咩錯
    你會見到 李嘉誠係2007 最高位賣左佢間公司咩?
    唔會 點解呢?

    另外 我諗巴菲特 最近的投資 唯一真的犯錯就係 係極高位買石油股
    其他投資 係長遠黎講都係有極大ge 獲利空間

    回覆刪除
  13. if you like and have time and sufficient data, you may consider measuring the performance with time-weighted rate of return (http://en.wikipedia.org/wiki/Time-Weighted_Average_Return). it is an acceptable methodology under GIPS (http://www.cfapubs.org/doi/pdf/10.2469/ccb.v2005.n5.4002?cookieSet=1).

    回覆刪除
  14. 如果個個好似市場先生咁管自己嘅錢,成個金融業就唔使玩。
    做trading嘅造市場先生嘅生意實死,一年先得個12個trades。做fund嘅,市場先生嘅方法同2800無咩分別,咁仲要D阿GER做咩,點食分紅。

    亦係點解市場先生呢到咁收反對者嘅歡迎。

    市場先生用咗大概8年就可以賺80%回報(仲要現市價係超低),有幾多fund可以做到,做到都唔代表係投資者賺到,因為d fee會高到離哂普,仲想點。

    將我地D MPF嘅performances同市場先生個倉比就可以知道市場先生嘅實力。

    市場先生正正做緊散戶要做嘅野不過會好唔受社會嘅歡迎。睇下388係咁promote Bull/bears或者warrant就知香港嘅政府係幾咁腐敗。

    回覆刪除
  15. "如果個個好似市場先生咁管自己嘅錢,成個金融業就唔使玩"

    "市場先生正正做緊散戶要做嘅野不過會好唔受社會嘅歡迎"

    唔好意思,小弟都係用這種"餓死agent"政策! XD

    回覆刪除
  16. 我同意無名氏所言, 令我茅塞頓開.

    回覆刪除
  17. 市場先生唔好意思真係睇唔過眼所以想講多兩句

    1)要行市場先生條路,重點係點樣可以長期點做好自己分工。然後,將慳埋落黎D錢,係唔影響自己份工嘅情況下,錢滾錢。(無工點有餘錢去滾錢)

    2)用最基本嘅角度去睇股市(買有經過風浪既實力同阿爺嘅照顧嘅公司,最好當然係有高股息喇 *有錯請更正*)然後長年累月咁買,有幾難。不過又係個句,個社會唔鐘意D人咁做,然後用盡方法同理論去批評。

    3)呢點亦係我覺得點解市場先生比其他人叻嘅地方,亦係最多人"少"佢嘅原因。亦係最重點,就係用股息加時間去錢滾錢。有咩好過,自己唔使出錢,唔使諗,但係股數繼續增加。D人會話多股數,無升幅有咩用,我就話,睇下市場先生係5仔嘅投資金額然後作總結。佢而家就話每股平均成本64.8,低過市價,如果升翻上去呢,多股數係着數好多。仲要股息比出嚟嘅會繼續將平均成本價降低。死未。呢d就係1百萬嘅10%同十萬既10%嘅分別,

    平常人邊可以一次過比咁多錢?市場先生都無,所以就要用時間去換金錢番黎。

    係唔使擺時間落股票市場日睇夜睇,小心理壓力,唔使一次過擺舊錢出黎同唔洗被人賺管理費下,錢滾錢,真係你地教我有咩容易過市場先生嘅方式。

    我唔係話市場先生嘅方法係唯一方法,投資又好,投機都好全部人都正係想自己個袋多個錢使。股市得10%人讚錢,重要呢班人通常係資訊同財源上有優勢,平凡人點學都冇用,亦無得學。

    提早財務自由,就係代表老左唔使睇人面口,唔係叫你努力炒股而發達。如果"多數人"可以炒股發達,我而家就唔使係到講廢話。

    想係股票市場賺錢(投資同投機都好)只可做小數人。其中一個方法就係呢個blog到教咗我地啦。

    我估如果真係要批評市場先生嘅porfolio,我估係佢唔夠集中,一般人睇5隻股票已經好夠。
    經得起考驗嘅公司+股數+時間+流通量真係加升值真係good combination。

    sorry市場先生我真係多言左

    回覆刪除
  18. 我覺得即使先生既投資回報較高位下跌不少,但重點係porfolio產生既cash flow 好強勁,要財務自由,cash flow 好重要 !

    回覆刪除
  19. 筆者成日都自吹自擂,成日話自己幾醒,眼光點好,可以賺到很好多利潤。但之前賺過,唔代表係「叻」,可能係「好彩」渣,食正條水,例如買中勁升的「中人壽」,下次唔知有冇咁好彩。否則,可能會一舖清袋。

    另外,筆者太過側重銀行及保險股,呢兩類股份是今次的重災區,仲要100%持股(大部份都係金融股),仲要月月增持,越跌越買,唔知何年何月才返家鄉!嚴重的可能會一舖清袋!

    筆者的網誌有很多人睇,影響力好大。我怕其他人學左筆者個套所謂的「投資方法」,咁就「大獲」了,唔係有咁多人,有幾百萬資本去買貨,另有月入幾萬,可越跌越買,可以守得耐D。

    我咁樣寫,都係唔想筆者的所謂「投資方法」誤度其他人。筆者個套方法真係會「害人害物」。我諗好多佢的FAN 屎|跟佢方法投資,都輸到「福街」。筆者呢家真係「害人害已」了。

    我看筆者被上次賺大錢的「勝利」沖昏了頭腦,以為今次同樣可以「乘勝追擊」,點知今次慘遭「滑鐵盧」,仲要死撐,猛話自己係「長線及價值投資」,不需要止蝕,仲要越跌越買,越買越多。我看筆者都係「不外如是」、「名不副實」,都係被傳媒吹奉出來,好似個「火尿深」吧。牛市個個都係股神,一到熊市,就會原形畢露了。

    我寫呢段野,都預左唔會被筆者登出來,我睇很多類似呢D「尖酸」的批評筆者唔會登出來,但我希望筆者能睇睇我呢段留言,好好「反省自己」,唔好係度「妖言感眾」同「害人害物」。就算呢篇野被筆者登出來,都會受到很多筆者的所謂FAN屎出來猛烈評擊了。

    回覆刪除
  20. I agree with "Barlin". That is also why I believe that Mr. Market has built up a very good portfolio.

    回覆刪除
  21. 上面無名氏, 正正因為長線投資於熊市時會遇到愈買愈跌的情況, 所以必須"用閑錢", 因為價值投資並不著重短期利潤, 所以要有長期坐艇的準備, 每人投資方法不同, 沒有人迫你去跟, 你未了解就去跟, 自己蝕了錢就怨天尤人, 仲有批評人唔敢打名, 閣下除了應學習如何投資外, 還要學習做人EQ
    唔明既人, 點講都唔會明

    回覆刪除
  22. 價值投資 係要買便宜貨
    所以越跌越要買
    當然前題係 個間公司有好好ge 價值
    同埋投入ge 資本 即使公司真係不幸倒閉都可以攞得番
    佢股價越低 你 risk exposure 以投入ge 資本角度黎睇 係越少 (e.g. NAV >> 股價)

    即使 一般金融界 提倡ge 平均成本法
    其實都係要越跌越買
    否則 長遠黎講 你手上股票ge 價格 拉唔出 股巿 長遠向上ge 平均線


    不過 我個人覺得 巿場先生用太高價買入股份
    同埋 以 巿場先生ge 知識技術 應該可以唔需要靠月供股票 仍然可以係低位買貨
    所以我始終唔太認同 巿場先生ge 投資手法

    回覆刪除
  23. Jospeh 我相信你係「市場先生」的死硬fan 屎,我冇你咁很咁高的EQ,亦都冇你咁Q醒,你咁很「叻」,一定是「投資高手」,不如你教我點「炒股」吧。

    我唔打名,因我是藉藉無名,開唔開名都冇人知,我都唔驚被人批評,呢度好多人都唔打名。

    我自問冇乜EQ及IQ,不過,我此終相信投資要「因時制宜」,要睇情況,必要時要改變策略,不可「一本通書睇到老」,要靈活變通。依家擺度明,「金融海嘯」後,所謂「長線及價值」投資已經不合時宜。我都係唔想其他網友學網主「重蹈覆轍」,付出沉重的代價。

    我咁樣講及質疑「市場先生」都預左比佢的FANs 批評。

    不過,我咁樣尖酸批評網主,「市場先生」真的很胸襟廣闊,EQ真高,照樣登我的留言,這是值得我學習及敬佩的!希望大家能繼續討論及交流。

    回覆刪除
  24. (「金融海嘯」後,所謂「長線及價值」投資已經不合時宜。)

    雖然我對市場先生中投資方法都開始有點質疑,但我記得兩年前他也試過在 60 多元沽走了平保,還引來很多批評他的意見。今天回看,他有否做錯呢?

    現在是金融海嘯"中",這樣快下定論,是否太早?

    回覆刪除