珠海見聞 (2)

今次珠海之行我總共去了3間超市, 分別係拱北的萬佳百貨, 九州城的"一加一"超市, 唐家灣的"榮一"超市, 可以睇到國內液體奶市場幾乎俾國內品牌壟斷左, 尤其係蒙牛和伊利. 3間超市我都見到只有蒙牛和伊利有獨立的牛奶屋, 即係在超市某個顯眼的地方, 堆砌單一牌子的種種牛奶產品, 即使在集中所有牌子的牛奶貨櫃上, 蒙牛和伊利的產品都比其他牌子多. 伊利係08奧運的贊助商之一, 見到劉翔的廣告的確幾醒神. 有人擔心伊利拿到08奧運贊助商資格, 對蒙牛不利, 因而認為應該買伊利而唔好買蒙牛. 我的睇法係, 如果伊利掂, 蒙牛就唔掂, 或者蒙牛掂, 伊利就唔掂的話, 即係伊利食的飯係從蒙牛手中搶來的, 如果國內奶業係咁話, 咁就連伊利的股票都唔好買, 因為咁既行業係無"錢"途的. 有"錢"途的行業, 飯係從消費者而來的, 唔係從同業競爭對手中搶過來的, 有"錢"途的行業, 飯會越來越大碗. 正如, 如果花旗賺大錢, 咁美銀都唔會差得去邊, 相反, 如果花旗唔掂, 美銀也唔會太好, 呢d就係所謂的, "一榮俱榮", "一損俱損". 觀察完市場, 睇唔到有值得為蒙牛擔心的地方, 信心從來唔應該建築在"股價上升"之上, 所以會繼續越跌越買, 唔需要為蒙牛設立止蝕位. 下場當然係繼續虧損, 見下圖.

同樣地, 我對匯豐的信心, 也不是建築在股價表現之上, 今日匯豐曾經跌穿130蚊, 目前於倫敦股價下跌1.91%創52週低位, 不過無損我繼續持有匯豐以及繼續以股代息的興致. 我對匯豐的目標係擁有更多的股數, 和收取更多的股息, 現時睇唔到有跡象會偏離呢個目標. 繼續做一個輕輕鬆鬆的投資者.

今日無加碼食品飲品股, 因為佢地既股價今日無跌到, 唔跌就唔買, 繼續持有20%的現金.