映完婚紗相了

本來上個月映婚紗相, 不過因為上次落大雨, 所以只係完成左室內布景的攝影, 戶外的攝影就安排在今日進行. 好在今日陽光普照, 所以好順利完成.

其實, 好彩上次落大雨要分兩次影, 因為上次影完室內布景已經接近晚上8點了, 如果室內室外一次過影晒, 可能要影到9點幾10點, 都幾疲倦. 分兩次影仲有一個好處就係有左第一次的經驗之後, 第2次會掌握得更加好, 所以今日的攝影進度比第1次流暢. 另外, 上次唔知道男仔係要自己搞頭髮, 所以出門時無特別處理, 而我的髮質係好柔軟個種, 唔gel頭唔得, 結果臨時先至自己gel頭, 結果唔係太滿意. 今次有左經驗, 在家裡搞好頭髮才出門, 結果影相的時候, 心情特別靚.

今次唯一一樣唔及上次的係個攝影助理. 上次個攝影助理同個攝影師非常合拍, 而且好鬼馬. 佢會將姿勢擺一次示範俾我地睇, 然後我地照住做, 佢擺女仔姿勢仲好過擺男仔姿勢, 真係好正, 令到我和女友輕鬆不少. 今次個攝影助理就比較行貨.

大熱天時影婚紗相都幾辛苦, 不過, 一生人得一次機會, 幾辛苦都值得. 當然, 也要讚下未來老婆仔著起婚紗, 配合個化妝, 特別漂亮. 影完婚紗相之後, 感到同未來老婆仔的關係又再進一步, 有種說不出的甜蜜與溫馨, 我地又多一個共同體驗的經歷了.

台灣yahoo: http://tw.myblog.yahoo.com/mr-market/
新浪Sina: http://graham_choi2003.mysinablog.com/
香港yahoo: http://hk.myblog.yahoo.com/mr-market/